Share this post

ਅਹਿਮਦਾਬਾਦ-ਇਕ ਵਿਸ਼ੇਸ਼ ਅਦਾਲਤ ਨੇ ਗੋਧਰਾ ਮਾਮਲੇ, ਜਿਸ ਵਿਚ ਇਕ ਰੇਲ ਡੱਬੇ ਨੂੰ ਲੱਗੀ ਅੱਗ ਵਿਚ ਸੜਕੇ 59 ਵਿਅਕਤੀ ਮਾਰੇ ਗਏ ਸਨ, ਦਾ ਫੈਸਲਾ ਸੁਣਾਉਂਦੇ ਹੋਏ 31 ਵਿਅਕਤੀਆਂ ਨੂੰ ਦੋਸ਼ੀ ਕਰਾਰ ਦਿੱਤਾ ਹੈ ਜਦ ਕਿ ਮੁਖ ਦੋਸ਼ੀ ਮੌਲਵੀ ਉਮਰਜੀ ਸਮੇਤ 63

ਹੋਰਨਾਂ ਨੂੰ ਬਰੀ ਕਰ ਦਿੱਤਾ ਹੈ। 9 ਸਾਲ ਪਹਿਲਾਂ 27 ਫਰਵਰੀ 2002 ਨੂੰ ਗੋਧਰਾ ਰੇਲਵੇ ਸਟੇਸ਼ਨ ਨੇੜੇ ਵਾਪਰੇ ਇਸ ਹੱਤਿਆ ਕਾਂਡ ਵਿਚ ਰੇਲ ਗੱਡੀ ਦੇ ਇਕ ਸਲੀਪਰ ਡੱਬੇ ਨੂੰ ਅੱਗ ਲਾ ਦਿੱਤੀ ਗਈ ਸੀ ਜਿਸ ਵਿਚ ਅਯੁੱਧਿਆ ਤੋਂ ਆ ਰਹੇ ਕਾਰ ਸੇਵਕ ਸਵਾਰ ਸਨ। ਇਸ ਘਟਨਾ ਤੋਂ ਬਾਅਦ ਗੁਜਰਾਤ ਵਿਚ ਭਿਆਨਕ ਫਿਰਕੂ ਦੰਗੇ ਭੜਕ ਉ੍ਯੱਠੇ ਸਨ ਜਿਨ੍ਹਾਂ ਵਿਚ 1000 ਤੋਂ ਵਧ ਲੋਕ ਮਾਰੇ ਗਏ ਸਨ। ਸੈਸ਼ਨ ਜੱਜ ਪੀ.ਆਰ ਪਟੇਲ ਜਿਨ੍ਹਾਂ ਨੇ ਸਾਬਰਮਤੀ ਕੇਂਦਰੀ ਜੇਲ੍ਹ ਵਿਚ ਫੈਸਲਾ ਸੁਣਾਇਆ, ਨੇ ਕਿਹਾ ਕਿ ਦੋਸ਼ੀ ਕਰਾਰ ਦਿੱਤੇ ਗਏ ਵਿਅਕਤੀਆਂ ਨੂੰ ਸਜ਼ਾ 25 ਫਰਵਰੀ ਨੂੰ ਸੁਣਾਈ ਜਾਵੇਗੀ। ਸਰਕਾਰੀ ਵਕੀਲ ਜੇ.ਐਮ ਪੰਚਾਲ ਅਨੁਸਾਰ ਦੋਸ਼ੀਆਂ ਨੂੰ ਕਤਲ, ਸਾਜ਼ਿਸ਼ ਰਚਣ ਤੇ ਰੇਲਵੇ ਦੀ ਜਾਇਦਾਦ ਨਸ਼ਟ ਕਰਨ ਦੇ ਦੋਸ਼ਾਂ ਤਹਿਤ ਦੋਸ਼ੀ ਕਰਾਰ ਦਿੱਤਾ ਗਿਆ ਹੈ। ਉਨ੍ਹਾਂ ਦਸਿਆ ਕਿ 25 ਫਰਵਰੀ ਨੂੰ ਸਜ਼ਾ ਦੇ ਮੁੱਦੇ ’ਤੇ ਸੁਣਵਾਈ ਹੋਵੇਗੀ ਤੇ ਉਪਰੰਤ ਸਜ਼ਾ ਸੁਣਾਈ ਜਾਵੇਗੀ। ਉਨ੍ਹਾਂ ਦਸਿਆ ਕਿ ਅਦਾਲਤ ਨੇ ਸਾਜ਼ਿਸ਼ ਤਹਿਤ ਗੋਧਰਾ ਕਾਂਡ ਵਾਪਰਨ ਦੇ ਸਿਧਾਂਤ ਨੂੰ ਪ੍ਰਵਾਨ ਕਰ ਲਿਆ ਹੈ। ਇਸ ਤੋਂ ਇਲਾਵਾ ਵਿਗਿਆਨਕ ਸਬੂਤ, ਗਵਾਹਾਂ ਦੇ ਬਿਆਨ, ਹਾਲਾਤੀ ਤੇ ਦਸਤਾਵੇਜ਼ੀ ਸਬੂਤ ਫੈਸਲੇ ਦਾ ਆਧਾਰ ਬਣੇ। 94 ਦੋਸ਼ੀਆਂ ਵਿਰੁੱਧ ਬਕਾਇਦਾ ਦੋਸ਼ ਆਇਦ ਕਰਨ ਤੋਂ ਬਾਅਦ ਮੁਕੱਦਮੇ ਦੀ ਸੁਣਵਾਈ 25 ਜੂਨ 2009 ਵਿਚ ਸਾਬਰਮਤੀ ਕੇਂਦਰੀ ਜੇਲ੍ਹ ਵਿਚ ਸ਼ੁਰੂ ਹੋਈ ਸੀ। ਗਵਾਹੀਆਂ ’ਤੇ ਜਿਰਹਾ 1 ਜੁਲਾਈ 2009 ਨੂੰ ਸ਼ੁਰੂ ਹੋਈ ਜਦ ਕਿ ਮੁਕੱਦਮੇ ਦੀ ਸੁਣਵਾਈ ਸਤੰਬਰ 2010 ਵਿਚ ਪੂਰੀ ਹੋ ਗਈ ਸੀ। ਸੁਪਰੀਮ ਕੋਰਟ ਨੇ 26 ਅਕਤੂਬਰ 2010 ਨੂੰ ਫੈਸਲਾ ਸੁਣਾਉਣ ’ਤੇ ਲਾਈ ਰੋਕ ਹਟਾ ਲਈ ਸੀ। ਇਸੇ ਦੌਰਾਨ ਬਰੀ ਕੀਤੇ ਗਏ 63 ਵਿਅਖਤੀਆਂ ਨੂੰ ਸਾਬਰਮਤੀ ਜੇਲ੍ਹ ਤੋਂ ਰਿਹਾਅ ਕਰ ਦਿੱਤਾ ਗਿਆ।

• Next >